Zer gertatzen da gazte talde bat, galdera garrantzitsu bat eta benetako irtenbideak pentsatzeko gogoa elkartzen direnean?

Ongizate emozionala deliberazio-prozesuko Aktibazio Foroaren lehen saioa ideia argi batekin hasi zen: gazteen ongizate emozionalaz hitz egin nahi genuen, konponbide posibleetan arreta jarriz.

Eztabaidak sortu ziren, hasieran zoro samarrak ziruditen ideiak eta agian sarriago izan beharko genituzkeen elkarrizketak…

Lehen geldialdia: zer ari zaigu esaten gazteria?

Saioa inkesta digitalaren emaitzak eta online fasean jasotako proposamenak partekatuz hasi zen. Datuen itzulera hutsa baino gehiago izan zen: gazte askok egunerokoan partekatzen dituzten kezkak, beharrak eta ideiak mahai gainean jartzeko modu bat.

Askotariko proposamenak azaldu ziren: kirola, natura edo abentura ongizate emozionala zaintzeko tresna gisa erabiltzen dituzten programetatik hasi, eta gazteentzako espazio ez-medikalizatuak sortzeraino, egoteko, partekatzeko edo laguntza eskatzeko aukera emango dutenak.

Hezkuntza emozionalari buruzko hausnarketak ere sortu ziren, baita komunitate-sareak indartzearen garrantziaz, kultura-espazioak sustatzeaz eta ingurune digitalarekin modu osasuntsuagoan harremantzen ikasteaz ere.

Gehien errepikatu zen ideietako bat izan zen ongizate emozionala ez dela pertsona bakoitzaren ardura bakarrik, kolektiboki eraikitzen ditugun harremanen eta inguruneen emaitza ere badela.

Amaiera partekatua (eta jarraitzeko gogo handia)

Saioa amaitzeko, osoko bilkura egin zen, eta talde bakoitzak arratsaldean zehar ateratako lan-ildo nagusiak partekatu zituen.

Batzuek komunitate-espazio gehiago sortzearen garrantzia azpimarratu zuten, eta erantzun kliniko hutsetatik harago joateko beharra. Beste batzuek hezkuntza emozional jarraitua jarri zuten erdigunean. Etxebizitzarekin, laguntza-sareekin, deskonexio digitalarekin edo hain indibidualistak ez diren inguruneak sortzeko beharrarekin lotutako ideiak ere agertu ziren.

Baina, batez ere, sentsazio partekatu bat geratu zen: parte hartzeko, kolektiboki pentsatzeko eta benetako eragina izan dezaketen proposamenak eraikitzeko gogoa dagoela.

Eta hau ez da hemen amaitzen. Aktibazio Foroaren bigarren saioak horretarako balioko du hain zuzen ere: ideia horiek guztiak lur hartu eta proposamen zehatz, bideragarri eta ekingarri bihurtzeko.

Hurrengora arte!